慢慢行又得，间唔中飞下又掂

大家知唔知道现时卖紧嘅最新一代Audi A8L要几钱？根据代理嘅资料，新车售价$1,298,000起。A8L除咗内笼豪华同舒适，内外都仲有好多顶级嘅装备，车价较高都合理。不过，如果我话你知，车价平大概$450,000嘅新一代A6都有部份A8L嘅装备，你又会唔会觉得新A6有少少「蔗渣价钱，烧鹅味道」嘅感觉？

用咗新设计嘅鬼面罩再加上更明显嘅骨位，令A6望落去唔会好似过往咁斯文，有返份跑感。

340匹马力，500Nm扭力

新A6嚟到第8代，代理暂时只引入配用3公升V6 turbo引擎嘅高级版55型号，新车售价$843,000。马力有340匹，500Nm嘅峰值扭力早喺1,370转已经可以爆晒出嚟，再配合quattro恆久式四驱系统，0-100km/h加速只需5.1秒就搅掂。另外，A6仲有一个48V嘅微混能系统，根据厂方嘅数字，呢个系统可以帮到部车每100km悭返0.7公升嘅燃油。

引擎格局方面，第8代嘅A6同A7都转用咗同一款、全新嘅V6 3.0TFSI turbo引擎，再加上7前速S tronic自动波箱。

呢套微混能系统主要透过以下嘅功能去帮部车悭油：首先，佢可以将定速滑行嘅时间延长，引述厂方提供嘅资料，用咗呢套系统之后车速如果有55-160km/h嘅情况下，可以提供40秒嘅定速滑行时间，其间引擎仲可以完全关闭添。而车速较低嘅时候（22km/h以下）start-stop功能就会介入，从而减低耗油量。当再俾油之后，位于车头嘅皮带挞车摩打就会帮手着车，除咗可以加快引擎重新启动嘅时间，仲可以将重启引擎时嘅震动降到最低。

48V嘅Mild-hybrid系统，包括引擎入面嘅皮带挞车摩打，车尾嘅10Ah锂电池。有别于Mercedes-Benz嘅EQ Boost，Audi嘅微混能系统为悭油而设计，对车行表现冇帮助。

用料高级，乘坐舒适

定位为高级行政房车嘅A6，主打梗係优先照顾后座乘客嘅感受，新车内笼比上一代更加阔落，特别后座乘客头顶空间非常充足、坐落去头顶唔会感到好大嘅压迫感，而双膝同前座背部之间，就有一个拳头左右嘅空间，综合嚟讲坐得非常舒服，啱晒老闆坐。话虽后座乘座性对高级行政房车而言好重要，不过Audi对整部车嘅乘客都唔会忽略，全车都用咗真皮凳，望落去高级得嚟坐得又舒服。

车厢入面嘅用料望落去好高级，无论前、后座坐落去都相当舒服。

四轮转向增灵活性

当行车模式设定为Comfort（舒适）嘅时候，部车反应确实比较迟缓，踩油之后好似要「停一停、谂一谂」之后先再加速，可幸嘅係驾驶感觉非常舒适，贯彻Comfort嘅设计。不过转用Sport（动力）模式之后就完完全全感受到部车嘅实力有几强劲，唔好睇佢外表斯斯文文，直路佢都飞得下㗎！再加埋由A8L移植过嚟嘅四轮转向系统（主动后轮转向），令部车无论高或低速过弯都稳定性与灵活性兼备。

其实四轮转向系统呢个技术并唔算新科技，多年前嘅Mazda 929、Honda Accord等车都曾经用过，由2000年开始欧洲车厂都将系统加入部分型号。A6嘅四轮转向嘅运作模式，当时速低过60km/h转弯嘅时候，后辘就会同前辘作反方向转动最多5度，咁样就可以模拟缩短轴距从而令回旋半径减少1m，去到11.1m。相反，车速高过60km/h嘅时候，后辘就会同头辘转向同一个方向最多2度，令中、高速过弯时候更加稳定。当日试车有机会经过几个迴旋处同试埋窄位调头，完全感觉到呢套四轮转向可以令一部车长有4,939mm、阔1,886mm、澳洲市场分类为Large Car（大车）嘅A6变到好似细车咁轻巧、灵活，四轮转向系统绝对係功不可没。除咗四轮转向之外，A6车身特别针对低风阻而设计，令到风阻系数降到只有cd0.24，对比上一代嘅cd0.25再低少少，所以高速行车嘅时候，车厢入面比之前更加宁静，令A6快得嚟仲保持到嗰份高雅感觉。

唔好俾A6行政房车嘅斯文外表呃咗，要飞起上嚟表现可以相当快！

同级第一次配备MMI触控系统

装备方面，新一代A6对比上一代，头尾灯採用咗LED灯，其中头灯仲用咗Matrix头灯，净係睇到Matrix呢个名就知佢有型啦！而指挥灯当然有现时新车必备嘅走马灯效果，令部车望落又型咗。车厢入面除咗一个解像度好高嘅TFT电子錶板，中间有两个分别10.1吋强化MMI导航专用屏幕，而下面嘅8.6吋屏幕主要用嚟校冷气之外，仲可以用佢嚟手写输入文字等等嘅功能。其余车内嘅装备就有3D泊车镜头、电动尾窗帘、一套靓声嘅B&O音响系统、軚控等等，现今所谓「基本」装备佢都有齐晒算係交足功课。

A6係Audi同级车入面首次加入全数码化MMI触控系统嘅车系，而呢套系统正正係由A8嗰边移植过嚟。

新一代嘅A6，新车叫价$843,000起，望落好似好乸脷咁，不过事实上比较同级对手嘅价钱，好似BMW 5系（540iA xDrive – M Sport Edition，新车价$979,000）、Mercedes Benz E-Class（E 400 Exclusive，新车价$949,000）都比佢更贵。大家有有好多相似嘅地方，例如匹数相约（BMW 340匹、Benz 333匹）、同样都係四驱，豪华内笼等等。如果你唔係对其余嘅两个牌子有特别嘅喜好，呢部A6应该可以考虑下。

新款A6用咗Matrix LED头灯，再加上19吋合金軨。

尾箱容量提升去到530公升，就算唔放平后座背都已经够晒日常生活需要。

除咗凳用咗真皮之外，车厢入面其他位置都有用到真皮做装饰。不过个人就唔太锺意A6嘅门板，一口气有齐晒桃木、猄皮同真皮，会唔会太过複杂？

全车都用名牌B&O音响，当然非常靓声。

Audi A6 55 TFSI quattro Spec.

引擎：2,995c.c. V6 turbo配48V Mild-Hybrid系统

马力：340ps/5,000-6,400rpm

扭力：500Nm/1,370-4,500rpm

传动：7前速S tronic自动波箱、附+/-模式

驱动：前置引擎、quattro恆久式四轮驱动

车身：4,939 x 1,886 x 1,457（mm）

轴距：2,924mm

0-100km/h：5.1秒

油耗：6.7-7.1L/100km

车价：$843,000起

查询：Audi HK（2528 2041）

Text: Daniel