法国车仲有得做

人买车存在羊群心理，以前个个用英国车或西德车，车冇人留意。好喇，有人话车又平又正时，就开始多人买，接住落嚟再有人话车耐用、唔识坏，车从此平步青云，站稳阵脚。同一条成功方程，现正被韩国车套用，上位中！咁一直被人话有品味嘅法国车又点？法国车样靓身材正，相信冇人会反对，不过咁惹火自然有啲脾气，成日听传闻话法国车易坏，要以感性盖过理性先买得落手，事实係点只有用家先会知。但种种传闻都令法国车一直弹唔起。就以Peugeot为例，最风光嘅时候係2000年左右，一款206有齐三路大军，206 GTI攻hothatch市场、206 XT首设玻璃天幕，而206 CC就厉害，用上当年罕有嘅电动开关硬顶外，车价更平到21万，营业员真係收订都收到手软。

车头用咗电镀鬼面罩及金属头唇，多咗啲高级感觉。

全新嘅车尾造型比上代更靓仔、更粗犷，似返部SUV！

当年206新车gimmick多多，令Peugeot喺前所未有咁受欢迎，喺街上面遇上嘅机率，大概同今日嘅VW Golf差唔多吧！咁现时嘅Peugeot又点？大概两年前、308 SW之后已经唔再引入私家车，只留低Expert货Van，单天保至尊撑起整个品牌。据知Expert有唔错市场反应，搵到餐饭食，正因为咁，代理今日再次投放资源引入私家车，一嚟就係第二代新款3008，唔係炒冷饭之作，外表有型、内笼够潮，法国车死忠粉丝冧唔冧先？

用咗新底盘令车长及轴距都增长，但车高就矮过旧款。

最新嘅第二代3008喺2016年巴黎车展上出现，2017年上市，市场虽然迟咗年几先有新车，但冇所谓啦，对粉丝嚟讲最重要係有新车、唔好净係得部Expert。今代3008用上EMP2模组化底盘，呢类底盘好处係可以因应组合而成不同尺码，甚至后悬挂嘅形式都可以改变，总之一个底盘可以造出多个车款，为车厂悭返唔少钱。呢个EMP2底盘同时用喺308、408、5008、Expert，甚至Citroen Picasso之上，又揭背车、又MPV、又货Van，你就知佢几多用途。

虽然前座採用全手动调校，但无损舒适乘坐性。

虽然冇天幕车顶增加空间感，但用咗全平地台，令脚部空间都有好好表现。

后座背可以向前翻摺，令尾箱空间更好使好用。

新款外表比上代多咗粗犷线条，更似一部SUV，而且车身长咗82mm、阔咗4mm及矮咗15mm，一望就觉得大部咗。此外，由于用咗新底盘关係，轴距都增长62mm，可以预料车厢空间都会大咗。一打开车门，最引人注目係外表精美、细小而平底嘅两点真皮軚盘，实在似赛车軚盘咁嘅手感。此外，虽然唔係用电动调校座位，但座位用料及形状都睇得出落本之作，腿部及肩部有出色承托。一直以来法国车都注重车厢硬件设计，好似3008咁，軚环靓、中控台用料独特、更甚者连音响都用上法国名牌Focal，但今时今日大mon.錶板当道，3008都係时候与时并进，增值一下呢啲花巧嘅软件先可以吸引到人。中控台冇乜多余按掣，只有几个主要功能选择，选择好功能后，就全靠上方嘅大touch mon.去微调各种设定，感觉hi-tech咗！此外，更重要係驾驶者面前整个錶板都改为彩mon.，一来可以显示更多行车资讯，二来錶板布局有多种变化，保证你唔会闷。

彩mon.錶板可以同时显示多种资讯及变化多种图案。

两点式軚盘仲有用平底设计，揸上去手感好似赛车。

法国车当然用法国名牌Focal音响，识音响就知呢个牌子係好嘢。

喺touch mon.可以操作多项电子安全系统。

中控台上只有几个掣，主要用作选择功能。

现时3008嘅意向卖价係$288,000，车上嘅安全设备已达到德国高级房车水平，倒后镜有盲点警示系统、行车线稳定系统、自动紧急剎车系统、驾驶者注意提示系统，甚至半自动泊车系统及360度泊车镜头都有，讲设备同价钱都冇得输！不过有一点值得留意，3008暂只有一个动力组合提供，引擎採用1.2公升三汽缸turbo形式，最大马力131匹、峰值扭力23.5kgm，配6前速自动波箱。「咁大部车用千二偈，够唔够力？」相信好多人都有呢个疑问，我可以大胆讲，忧虑只係多余，因为呢个输出用喺车重1,450kg嘅3008上已绰绰有余，你唔会用3008去玩0-100km/h或经常180km/h行车吧？呢副引擎好处係轻身而且有好好低转扭力表现，起步表现爽朗，低、中速加速表现比1.5公升自然吸气引擎更好，如非车速上到130km/h打后，都冇脚软表现。另一重点係细容积有更低耗油表现，厂方数据係5.2L/100km，拍得住啲hybrid车！

1.2公升turbo引擎已经有131匹马力及23.5kgm扭力，喺地使用真係非常够用。

6速自动波其实都有+/-模式，但只可以喺軚盘拨片操作。

Peugeot 3008 1.2L Spec.

引擎：1,199c.c. 直三turbo

马力：131ps/5,500rpm

扭力：23.5kgm/1,750rpm

传动：6前速自动、附+/-模式

车身：4,447 X 1,841 X 1,624(mm)

轴距：2,675mm

车重：1,450kg

耗油：5.2L/100km

车价：$288,800起

查询：AutoFrance（2834 4233）

 

Text：Chris